ЭРДЭНЭТ СҮМ — ИТГЭЛ, НЭГДЭЛ, ҮЙЛЧЛЭЛЭЭР ДҮҮРЭН ОН
Эрдэнэт сүмийн хувьд энэ он итгэл, залбирал, нөхөрлөл, үйлчлэлээр дүүрэн, Бурханы нигүүлслийг олон зүйлээр мэдэрсэн он жил байлаа.
Бид оны эхийг гишүүдтэйгээ хамт залбирал, итгэл найдвараар эхлүүлж, нэг зорилгын төлөө зүрх сэтгэлээ нэгтгэн, сүмийнхээ үйлчлэл болон нийгэмдээ чиглэсэн ажлуудаа эрч хүчтэйгээр эхлүүлсэн юм.
Гишүүдийн айлчлал, халамжийн үйлчлэл тогтмол явагдаж, нэгнээ дэмжин урамшуулж, баяр гуниг бүхэнд хамт байж, сүмийн гэр бүлийн үнэ цэнийг улам бэхжүүллээ.
Эсийн бүлгийн цуглаанууд амжилттай зохион байгуулагдаж, гишүүд маань жижиг бүлгээрээ дамжуулан Бурханы үгийг хуваалцаж, харилцан суралцаж, залбирч, итгэлээрээ өсөх боломжийг бүрдүүлсэн.
Мөн сүмийнхээ хүрээнд баярын мэдээ болон тусгай хөтөлбөрүүдийг амжилттай зохион байгуулж, олон хүнийг хамруулан, баяр хөөр, итгэл найдвар, хайрыг түгээсэн сайхан мөчүүдээр дүүрэн байлаа.
Хүүхэд, залуучуудын баярын мэдээний үйл ажиллагааг онцгойлон зохион байгуулж, шинэ үеийнхэндээ Бурханы хайр, итгэл найдвар, зөв амьдралын үнэ цэнийг хүргэхэд анхааран ажилласан. Хүүхэд, залуучуудын идэвх оролцоо нэмэгдэж, тэдний авьяас чадвар, бүтээлч оролцоо сүмийн үйлчлэлийн нэгэн чухал хэсэг болж чадсан юм.
Түүнчлэн баг, хороотойгоо хамтран нийгэмдээ хүрч ажиллаж, орон нутгийнхаа иргэдэд хэрэгтэй үйл ажиллагаанд оролцон, сүм бол зөвхөн өөрсдийн хүрээнд бус, нийгэмдээ хайр, халамж, сайн үйлсээрээ үйлчлэх ёстой гэсэн үнэт зүйлээ бодитоор хэрэгжүүллээ.
Мөн сүмийнхээ орчин нөхцөлийг сайжруулах, өнгө үзэмжийг нэмэгдүүлэх зорилгоор засвар тохижилтын ажлуудыг гишүүдийнхээ хамтын хүч, хөдөлмөрөөр хийж гүйцэтгэлээ. Нэг бүрийн оролцоо, гаргасан сэтгэл, хөдөлмөр бүхэн сүмийн маань орчныг төдийгүй бидний хамтын нөхөрлөлийг улам сайхан болгосон юм.
Энэ бүх ажлын ард нэг зорилго, нэг итгэл, нэг зүрх сэтгэлээр нэгдсэн сүмийн гэр бүл байлаа.
Өнгөрсөн хугацаанд бид хамтдаа залбирч, хамтдаа хөдөлмөрлөж, хамтдаа баярлаж, хэрэгтэй нэгэндээ гараа сунган, нийгэмдээ гэрэл болон үйлчлэхийг хичээлээ.
Эрдэнэт сүмийн нийт үйлчлэгчид, гишүүд, сайн дураар оролцсон хүн бүртээ чин сэтгэлийн талархал илэрхийлье.
Цаашид ч бид итгэлээрээ батжин, хайраараа нэгдэж, нийгэмдээ сайн сайхныг түгээн, Бурханы хаанчлалын төлөө хамтдаа үйлчилсээр байх болтугай.
Эрдэнэт сүм — Итгэлээр нэгдэж, хайраар үйлчилж, сайн мэдээгээр гэрэлтүүлнэ.
